د. رەوشت رەشید
لەماوەی رابردوودا لە دەزگاكانی راگەیاندن گوێبیستی هەواڵێكی سەیر بووین. ئافرەتێك كە نەخۆشی دەروونی هەیە خزم وكەسەكەكانی دەیبەن بۆلای شێخێك بەنیازی چارەسەركردنی. كاتێك دەگەرێنەوە شۆفێری ئەو تەكسیەی كە دەیانگەیێنێتەوە ماڵ پێیان دەڵێت ئەم كچە چیەتی؟ ئەوانیش دەڵێن نەخۆشی دەروونی هەیەو بردمان بۆلای مامۆستا مەلا ( ... ) بۆئەوەی چارەسەری بكات، بەڵام هیچ سوودی نەبوو. كاكەی شۆفێریش دەڵێت : ئەمە دیارە جنۆكە چۆتە لەشیەوەو دەبێت ئەو جنۆكانە دەربكرێن، من ئەتوانم چارەسەری بكەم . ئیدی خزم و كەسی نەخۆشەكە ئافرەتەكە و عەقڵی خۆیان تەسلیمی كابرای شۆفێری تەكسی دەكەن، ئەویش بۆئەوەی جنۆكەكان دەربكات دەكەوێتە گیانی ئافرەتەكەو داركاریەكی باشی دەكات. نەخۆشەكە لەتاو ئازار دەست دەكات بەگریان وهاوار، هەندێ لە هەواڵەكان دەڵێن خزم وكەسی نەخۆشەكە لەگەڵ كاكەی شۆفێر بەشداریان كردووە لەو پرۆسەی چارەسەریەو تا ژنەكە گیان لەدەست دەدات ئەمان لە داركاری ناوەستن.
ئەم رووداوە ماناو مەدلولی زۆری هەیەو شتگەلێكی زۆرمان پێدەڵێت دەربارەی عەقڵیەتی كۆمەڵگاو دەسەڵات و میدیای كوردی. ئەم چیرۆكە پیشانی دەدات كە عەقڵیەتی تاكی كورد سەر بەچ بیركردنەوەیەكی جاهیلانەیەو دەیسەلمێنێت كە خورافەو جەهل لەكۆمەڵگای ئێمە چ رۆڵێكی گەورە دەگێرن .
رەنگە كەسێك بپرسێت كێ لەم جەهلە بەرپرسیارە؟ من دەڵێم راستە هەموو تاكێكی كۆمەڵگا بەشێك لە بەرپرسیارێتی دەكەوێتە ئەستۆ، بەڵام بە پلەی یەكەم دەسەڵات و بەپلەی دووەمیش راگەیاندن بەرپرسن لە بڵاوكردنەوەو بەردەوامبوونی ئەم جەهلە.
ناوە ناوە لێرەو لەوێ زاتێك دروست دەبێت ناو لەخۆی دەنێت مەلا یان شێخ فلان و بەسوود وەرگرتن لەبێدەنگی دەسەڵات و بێئاگایی یان خۆبێئاگاكردنی راگەیاندن و خەڵك، بەهەوەسی خۆی یاری بە زانست و تەندروستی و چارەنوسی خەڵك ونەخۆش دەكات. بەڵام كێشەی گەورە ئەوەیە دەسەڵات و حكومەت نەك هەر رێگر نین لەم دیاردەیە بەڵكو زۆرجار هاندەری ئەم حاڵەتەن.
لە سەردەمێكدا كەهیچ هێزێكی زانستی لە دونیا نەیوێراوە بڵێت ئەتوانم چارەسەری شێرپەنجەو ئایدز بكەم، دەسەڵاتی كوردی رێگە دەدات بە نەخوێندەوارێك بەوپەری جورئەتەوە بڵێت: من شێرپەنجەو ئایدز وسەرجەم نەخۆشیە كوشندەكان چارەسەر دەكەم وبەبێ هیچ بنەمایەكی زانستی و لۆژیكی چەندین شێوازی نامرۆیی و ناتەندروستیانە بەكاربهێنێت بۆ لەخشتەبردنی خەڵك و پارە پەیداكردن، لەبەرامبەریشدا سەندیكایەك، دەزگایەك، وەزارەتێك، لیژنەیەكی چاودێری و مافی مرۆڤ یان هێزێكی یاسایی نیە لێپرسینەوە لەدۆخێكی وەها بكات و سزایەكی یاساییانەی ئەم جۆرە كەسانە بدات. لەوەش زیاتر لە دەزگاكانی راگەیاندنیش دەرگایان بۆ دەكرێتەوە بە ئیسراحەتی خۆیان ئەم جەهلە بڵاوبكەنەوە.
كاتێك كۆمەڵێك تەڵەكەبازو هەڵپەرست و نەخوێندەواری ئاوها بێچاودێری حكومەت دەبنە مۆڵگەی هەڵخەڵەتاندن و جەهل و، دەزگاكانی راگەیاندنیش دەبنە قاسید وبڵندگۆی بڵاوكردنەوەی ئەم جەهلە، ئیدی ئەمرۆ شۆفێری تەكسی وسبەی وەستای سپیكاری و دوسبەیش فیتەرو جامچی و هەرچی هەیە دەبێتە دكتۆرو، ئەگەر بۆ نەخوێندەوارێك ئاسایی بێت شێرپەنجەو ئایدز چارەسەر بكات، بۆ شۆفێرێكی تاكسیش هەر زۆر ئاساییە ببێتە چارەسەكارو بەدارو تێهەڵدان جنۆكە لەجەستەی خەڵك دەربكات.
لەكۆتاییدا دەڵێین سەیركەن چۆن تەندروستی و چارەنوس وگیانی خەڵك ئەبێتە كاڵاو دەكەوێـە ژێر رەحمەتی خورافەو جەهل. گەلۆ كە وڵات و میللەت بێساحێب بوو، كە دەسەڵات تەسلیمی جەهل وخورافە بوو، ئیدی ژیانیش دەبێتە یاریەكی بێمانا.
